Insaniyat Jinda Hai !!

Bachpan se hi hame logon ke kaam aana aur maanavmaatra ki sewa karna sikhaya jata hai taki ek -doosre ki madad kar ham sabki jindagi khubsoorat ban sake. Bhagwan hame alag-alag nahi apitu ek hi srishti ke roop me dekhta hai atah yah anivaary tha ki ham alag-alag kuchh adhoore se hain. Par jab sab saath ho jate hain to khushiyan chauguni aur taklifen chauthai hi rah jati hain. Pehlepahal to aise anek udaaharan ginaye ja sakte the parantu aaj ke samay me jab badhti jansankhya ke kaaran ek anaar sau bimaar ki stithi aa gai hai to logon me apni jeb bharne ki hi cheshtta rahti hai. Paraye to pareye, apnon ko bhi koi nahi poochhhana chahta hai.

Ranchi ke ek vriddha doctor ne pichhale 55 varshon se insaaniyat ki sewa kar ek aisa aadarsh prastut kiya hai jispar chalna sabke bas ki baat nahin fir bhi we navjawanon ke preranastrot hain kyonki unhone ye sabit kar diya hai ki dhanwaan se bada hota hai dayawaan. Dr. Shyama Prasad Mukharjii 1957 se apne marijon se doctari fees ke naam par maatra 5rs lete hain. Unka maanana hai ki chunki garib marij mahange ilaaj nahi kara sakte hain atah fees kam hi honi chahiye. Doctor sahab roj 2 ghante garib marijon ko dekhte hain aur unse li hui fees ka prayog unki dawaon me karte hain taki marijon ko muft dawa di ja sake. 

Aaj ke parivesh me jahan Andhra Pradesh ke doctor sarkari aspataalon me garibon ko upalabdh muft dawayen na dekar tadapta hua marne ke liye chhod dete hain wahin Dr. S.P. Mukharjii jaise doctor garibon ke liye kisi maseeha se kam nahi hain.Maanavtavadi karyon ke pichhe unka swayam ka ek niji dard bhi chhuphai, unki pratham patni ki mrityu ek laailaaj bimari ki wajah se hui thi aur doosri patni bhi kuchh varshon se asaadhya rog ki wajah se bistar par hain. Ispar bhi ye maanavsewi doctor apni nishtta banaye hue hain aur spasht roop se kahte hain ki yadi paise hi kamaane hota to doctor kyon banata, kuchh aur karta. Khushi hoti hai aise logon ke bare me jaankar jo maanavata ki sewa ko sadiav tatpar rahte hain.