Raja wahi jo praja ka khyaal rakhe

Sanskrit me ek kahavat hai, " Yatha raja , tatha praja" matlab, jaisa raja hoga waisi hi praja hogi. Yah kahavat aaj bhi satik baithti hai. Jab satta me aaseen bade log hi beimaan honge to aap chhote star par beimaani kaise rok sakte hain ? Sarkar dwara prastut Janlokpal Bill me Pradhanmantri aur Nyaypalika dono ko Lokpal ke daayare se alag kar diya gaya hai, itana hi nahin, Central ministers, Ex- PM, secretaries,saansad, rajya sarkaren, sthaniy prashasan aur chhote karmchari bhi isake daayare me nahi rakhe gaye hain. Had to yah hai ki agar 7 varshon ke andar kaarywaahi nahi hui to aaropi swatah aaropmukt ho jayega. Lokpal ke paas kewal jaanch ka adhikar hoga aur usey sambandhit adhikari par kaarywaahi ka koi adhikaar nahi hoga.

Aaiye isake andar ki baaten bhi jaan lete hain, Lokpal nyaaypalika ka hi koi vyakti hoga, atah isame koi rajnitik vyakti lokpal nahi ban sakega. Lokpal CBI, central government aur state government se apne adhikari chun sakega.Wah mamle ki jaanch karega aur mamla court le jayega atah wah swayam dand nahi dega.  Lokpaal ko diye gaye adhikaar ke naam par kewal yah hai ki, Lokpal corrupt officers ki sampatti jabt kar sakega. Bus itna hi ! Sach to yah hai ki Bharat ko aise kisi Lokpal Bill ki jarurat hi nahi hai pehli baat , doosri baat, jab Lokpaal na upper lavel nahi lower level ke logon ko pakad sakta hai to middle level ko kyon target kiya ja raha hai , taki upper level aur lower level usaki raksha kar saken? 

Sach yah hai ki is desh me, garib lutta hai ya wah vyakti lutta hai jo sapne dekhata hai kyonki aap kewal usey hi to loot sakte hain.  Yan dono hi upper level aur lower level se apna kaam karate hain. Bhale hi nimn star par 500 rs ki rishwat se kaam ho jata ho par yh sochane ki baat hai  ki nimn varg ke log ye 500rs kaise jutate honge? apne har sahi kaam ke liye unhe chaparasi se lekar chhote babu tak sabko dakshina chadani padti hai, chahe mamla adalat me ho, aspataal me ya tahasil office me. Yahi haal un vyapariyon ka bhi hai jo apna business badhana chahte hain, upar se neeche tak sabko khush karna padta hai varna sadiyon purane kaanuno ki aad me unke sapne sada diye jate hain. Naukari ke naam par thagi aur bhai-bhateejavaad aam baat ho gai hai. Janata ne bhi isey dukhi man se sweekaar kar liya.

Par ab nahi, desh ek neta ki kami se joojh raha tha jo ki Anna Hajare aur Baba Ramdev ne poori kar di hai. Agar Pradhanmantriji sach me imaandar hain to unki cabinet itani bhrasht kyon hai, ye jaankaar aur hoshiyaar logon ne kaun sa desh ka bhalaa kar diya hai ki inhe hataaya nahi ja sakta. swachchh chhavi ke log shayad aap ki najar me utane hoshiyaar naa hon par bure bhi to nahin hain na, unhe mauka dijiye aur desh ki nabz samajhkar beimaanon ka patta saaf kar dijiye. Kis baat ka intajaar hai aapko, ye chuppi shak paida karti hai. 

Kya BJP aur anya dal iss maamale ke dhumil ho jane ka intajaar nahi kar rahe hain, varna kya kaaran hai ki jo BJP Anna aur Ramdev ka samarthan karti hai wah apne hi bhrasht Mukhyamantri ko nahi hataa pa rahi hai. Loktantra to majak ban kar rah gaya hai, Yediyurappaji bade aaraam se apne kursi chhodne ki date bata rahe hain , koi sharam nahi ! ye kya bhala karenge desh ka? Inse to naujwaan hi achchhe, kaam nahi janenge to bhrashtachar me bhi to kachche honge. Hamara media bhi kam doshi nahi hai, paak ki videsh mantri ke husn ki tarifon ke pul baandh raha hai bajaye sakht sabdon me unhe apne jajbaat prakat karne ke, unki julfon aur handbad ke bare me baat kar raha hai. Ye rating pasand channels chahte to lagataar bhrasht adhikariyon ka bhandafod kar sarkar ki hawa nikal dete aur sarkar itana kamjor Bill lane ki himmat nahi kar pati par nahi. Ye to intajaar kar rahe hain ki Anna fir se anashan par baithen, fir TRP bade to maja aaye. In news channels se achchhe to Laptaganj aur Tarak Mehta Ka Ulta Chashma jaise serial hain jinhone apni kahaniyon ke madhyam se ye batane ki koshish ki, ki bhrashtachaar nichle star par bhi bade paimane par ho raha hai jiski andekhi nahi ki jani chahiye. 

Desh ki janta se yahi apeksha hai ki wo ekjut hokar bhrashtachar ki ladai lade aur sarkari paintaron me naa ulajhe. Achary Balkrishn ke peechhe jaise CBI padi hai, saaf najar aata hai ki sarkari tantra Anna aur Baba Ramdev ka aandolan poori tarah suniyojit shadyantra karke kuchalana chahti hai. Mujrim pakadane ki itani tatparata to un logon ke khilaaf bhi nahi dikhaai ja rahi hai jo hajaron karonon ka ghotala kar rahe hain to fir Baba ke sahyogi ke khilaaf CBI janch kyon? Satta ke mad me choor logon ko ye samjhaana padega ki ye satta hamane unhe di hai aur ham yah jaanane ka poora haq rakhte hian ki hamare dhan ka sattaseen logon ne kya upayog kiya aur kya durupyog kiya? Janata ab jaag chuki hai, sarkar isey samajh legi to aage bhi nirvivaad roop se shasan karegi anyatha Bharat me bhi khaadi deshon ki hi tarah sushasan ki sthapna hetu  kranti ho sakti hai. Ab to Raja wahi hoga jo apne se pehle apni praja ka khyaal rakhega.