Bilaspur Bulaavat He.... hooooo....hooooo !!

RAAUT NAACH 

(must watch this video)


Tithi - Devuthani Ekadashi
Place - Mere Dadaji ka Ghar (Bilaspur)
Programme - Raaut Naach
Year -  1986-93

zor se aawaaj aa rahi hai, hoooooooooooo.............hoooooo hhooooooooo. Ham bachche daudate hue baahar aaye aur apne dadaji se poocha ki kaun aaya hai? dadaji ne kaha,' ghar ka raut Amar aaya hai'. hum dekhne lage aankhen fadkar, 'magar kahan hai Amar, ye log kaun hain?'

Chhattisgarh me gwale ya doodhwale bhaiya ko raut kahte hain. Ye jis ghar me doodh pahunchate hain unse jindagi bhar ke liye jud jate hain aur apne prem aur lagaav ka pradarshan karne apne poore gwale/raaut (राऊत )  mitron ke saath saj-dhajkar Raaut Naach (राऊत नाच ) ka pradarshan karte hain. Devuthani Ekasashi se prarambh hokar yah Nach ek saptaah tak chalta rahta hai. Der raat tak Gwale ghar-ghar jaakar yah nach karte hain.

Yaduvanshi samaaj dwara kiya jane wala yah nritya apni vishesh veshbhoosha aur gaanon ke liye to jana hi jata hai apitu dekhne layak hota hai in nartakon ka utsaah. lagaataar hooooo...hooo ki dhwani kar chhattisgarhi me devi-devataon ke geet gate hain aur saath hi apne malik ko aur paise dene ke liye ukasaate hain. Sabke prati apne pyaar ko jatate hue ye ghar ke bachchon ko kandhe me uthaakar aisa naachte hain ki bas. Ham to bahut khush hote the, aaj bhi yaad hain Amar bhaiya. Jaise hi Raaut Naach ka samay aata hai, unki yaad aati hai, bas ek baat buri thi, wo nashe me dhutt hote the aur badi jor ki daru ki badboo aati thi fir bhi, wo sab bachpan ki pyari yaadon me se ek hai isliye koi shikayat nahi   [ : )

Raaut Nach ki wajah se aaj Bilaspur ki vishv patal par apni ek pahchaan ban gai hai. Aaj 34th raaut naach mahotsav Bilaspur me shuru ho raha hai. Aaiye, Bilaspur me Aapka Swagat hai. Yah tay hai ki is naach me shaamil hokar aap bhi khud ko Yaduvanshiyon ke saath nachene se nahin rok payenge.